الامين احمد

بسال عليك دوام حبي ومضاميني
رغما علي الايام لابد تلاقيني
ليه ياحبيب روحي كيفن مخليني
يصبح عزاك نوحي ترحل تجافيني
تطرد طيور دوحي روعة بساتيني
ياكلمة في بوحي ليه انت ساليني
انا ياحبيب قلبي همك مقاسيني
ساكن قصاد دربي في لحظتي وحيني
يشهد علي ربي واطيها نار بيني
ارحمني ياحبي ومن حنك اديني
وريني شن سويت ليشن معاديني
يااحلي مااتمنيت اطراك وناسيني
لو زيي يوم لاقيت بالله وريني
ياما وراك بكيت اللوعة تكفيني
حاكم علي بالهم ذارف دموع عيني
ماكفي جبت الغم في قيدو زاجيني
انا بيك بتالم بس مين يواسيني
محبوبي لو تعلم طيفك مزازيني
اه ياعيون تجرح نظراتا ترميني
رغما عليْ بسرح في باحة تشقيني
بي وين اشوفلي فرح حزنك مبكيني
ياحبي لو تسمح جاييك تصافيني
ولو في النصيب مكتوب تتكضب الشيني
وقلبا عليك يذوب بي شوقو يكويني
كان ظني يا محبوب انك بتحميني
ليه شوقك المعصوب قلب موازيني